LAOAG CITY – Sumango ti kaso a grave threat with the use of firearm and illegal possession of firearm wenno ti Republic Act (RA) 10591 ti lalaki a natiliw gapu iti maipagarop a panangipatpaturong na ti paltog na iti sumagmamano a residente iti Brgy. Juan iti ili ti Solsona.
Immunan a naireport iti Philippine National Police iti ili ti Solsona, bayat nga agpadpadaya ni Alpie Jacobo y Quebral, agtawen ti 28, naasawaam ken residente iti Brgy. Juan iti nasao nga ili usar ti motorsiklo na a Yamaha Sniper 155 ket pinagsardeng ti suspek a ni Jerome Andres y Abadilla, agtawen ti 40, awanan ti asawa ken residente iti Brgy. Bagbag, Solsona bayat nga agtatakder iti likod ti lugan na a Toyota Fortuner.
Ditoy a maipagarup nga inbatad ti suspek nga agsarita da ken ni Jacobo kagiddan ti maipagarop a panangala na ti paltog na manipod iti lugan na ken inkasa na daytoy sakbay a ginandat na a paputukan ti biktima.
Nupay kasta, nakataray a dagus ni Jacobo kimmamang iti kwerpo ti pulisya tapno maireport ti napasamak.
Kabayatanna, malaksid ken ni Jacobo ket maipagarop a pinaturungan pay ti suspek ti nabigbig a ni Emerson Hora y Salvador a residente iti Brgy. Juan iti nasao nga ili.
Rumrumuar nga iti dayta a gundaway ket naggapo ti suspek iti dalan nga asideg ti Iglesia Independiente ken apaman a nakadanon iti crossing ket nagsardeng ken dita nga intutok na ti paltog a nakakasa ken ni Hora sakbay a nagturong iti laud a direksyon.
Mainaig iti daytoy, maipagarop nga inpaturong pay ti suspek ti paltog na kada Santiago Cabaya y Consolacion ken ni Mary-ann Cabaya y Cudal nga agpada a residente iti Brgy. Juan.
Iti panagresponde dagiti otoridad ket natiliw da ti suspek no sadinno a nakumpiskar da ti cal. 40 pistol a nakita a mismo iti passenger seat ti lugan na nga addaan ti magazine ngem awan ti bala na.
Agtultuloy ti imbestigasyon dagiti otoridad tapno maamoan ti motibo iti napasamak.
Kabayatanna, rumrumuar a nakainom ti nasanger ti suspek idi napasamak ti insidente.
