LAOAG CITY – Nabirukanen a natay ti maysa a lalaki nga agan-anup kalpasan a natnag iti nauneg a paset ti kabanbantayan iti Mount Maguinaray a nagbedngan ti Ilocos Norte ken Abra.
Daytoy ti inbatad ni Mr. Antonio Pugyao iti Barangay Cacafean iti ili ti Marcos.
Immunan nga inrakurak ni Pugyao a ti biktima ket ti dua pay a kadwa na ket napan da naganup iti kabanbantayan iti nasao a lugar.
Inbatad na a nakaawat ti tawag manipud iti maysa kadakuada a nangipakaammo a natnag ti maysa kadagiti kadua da.
Gapu iti daytoy, kunana nga insigida a nangbukelda ti grupo nga agarup 10 nga indibidual tapno agresponde ken biruken ti maseknan a lalaki a nabigbig a ni Gringo Barit, naasawaan, adda ti umno a tawen ken residente iti Barangay Cacafean iti ili ti Marcos.
Inlawlawagna a sumagmamano nga oras a binirbirukda ti kabarangayanda ngem saanda daytoy a nakita agingga a simmipngeten ti tangatang isu a nagdesisionda nga isardengen ken ituloy iti kabigatanna.
Naamoan a saan a dagus a naipakaammo ti napasamak kadagiti otoridad no sadinno a kalpasan ti tallo nga aldaw a saanda a mabirukan ti biktima isu paylaeng ti panagreport da iti Philippine National Police.
Babaen iti panagtitinnulong dagiti kameng ti Philippine National Police, Philippine Army, Bureau of Fire Protection, rescue team manipod iti ili ti Marcos ken Nueva Era ken dadduma pay nga indibidual ket nabirukan da ti biktima ngem awanen ti biagna.
Naammoan a daytoy ti umuna a gundaway nga adda ti napasamak a pannakatnag dagiti residente kabayatan ti panaganup dagitoy iti kabanbantayan a kangrunaan a pagbiaganda.
