LAOAG CITY – Nagpositibo iti drug test ni Mr. Ferdinand John Dagupion, agtawen ti 22, lineman iti PLDT Company ken residente iti Barangay Garreta iti ili ti Badoc.
Daytoy ti kinumpirmaran ni Police Senior Master Sergeant Marcelino Corpuz Jr., ti team leader iti Provincial Drug Enforecement Unit (PDEU) ditoy probinsya.
Maipalagip a natiliw ni Dagupion iti naiyuswat a drug buy-bust operation iti Barangay 50, Buttong ditoy ciudad ti Laoag idi rabii ti lunes, Pebrero 7 ita a tawen.
Nakumpiskar dagiti otoridad iti ikot ni Dagupion ti dua a babassit a sachet a maipagarop a marijuana, maysa a ziplock a naglaon met laeng iti napagango a marijuana, maysa a kalibre 45 a paltog, maysa a bala ti nasao a paltog, dua ribo a pisos a personal a kwarta na ken ti cellphone na.
Naipila metten ti kaso a panaglabsing iti Republic Act (RA) 9165 wenno Comprehensive Dangerous Drugs Act of 2002 ken ti panaglabsing iti Republic Act (RA) 10591 wenno Illegal a panagikot ti paltog kontra ken ni Dagupion.
