LAOAG CITY – Kinumpirmaran ni P/Maj. Jephre Taccad, Chief ti Provincial Operation Management Unit ti Ilocos Norte Police Provincial Office a maipagarup a love triangle ti maysa kadagiti motibo iti pannakapaltu-paltog ni ABC President Mark Adrian “Macky” Barba.
Segun kenkuana, rumrummuar iti inwayatda nga imbestigasion nga adda ti babai ni Kapitan Barba no sadinno a daytoy a babai ket naasawaan.
Inbatadna ti nasao a babai ket kadua ni Barba iti maysa a negosio ken nagam-ammoda gapu iti negosio.
Inlawlawagna a gapu iti daytoy ket mapapati a naaddaan ti relasion dagiti dua.
Mainaig iti daytoy, inpakaammo ni P/Maj. Taccad a basar iti Special Investigation Task Group, manarimaan ti panangberipikarda kadagiti ala ti Close Circuit Television wenno CCTV camera no sadinno a nakitada nga adda ti maysa a van nga agmaris ti puraw a naisubmitir daytoy iti Anti-Cybercrime Unit.
Kuna ni Taccad a basar ken ni P/Capt. Randy Damo, Hepe ti San Nicolas Municipal Police Station a nagkedked a mangipaay ti komento ti pamilia ni Barba.
Inpalgakna a manarimaan pay laeng ti bullet trajectory ti Forensic Unit no sadinno a tallo a lugan ti karaman iti insidente.
Kunana nga adda ti mabirbirok a maysa nga indibidual a taga maikadua a distrito a maipagarup a nakariri ni Barba iti galyeraan.
Innayonna a manamnama a rummuar ti resulta ti medico legal dagiti biktima ita nga aldaw.
Kabayatanna, inlawlawag ni Taccad nga adda ti maris pulitikana ti pannakapaltu-paltog ni Barangay Chairman Francisco Bagay Jr. ti Brgy. 5 iti ili ti San Nicolas kas maibasar iti imbestigasion ti Special Investigation Task Group.
Maipalagip a napaltu-paltogan ni Barangay Chairman Bagay Jr. idi Setiembre idinto nga ita laeng a bulan ti Oktubre ket napaltu-paltogan met da ABC President Barba pakairamanan dagiti dua a bodyguard-na.
