LAOAG CITY – Sinukimat dagiti otoridad ti Metallic Gray Innova a maipagarop a nagluganan dagiti dua a lallaki nga adda ti pakainaigan na iti napasamak a pammaltog San Nicolas-Paoay Road, bisinidad ti Barangay 17 iti ili ti San Nicolas.
Napasamak daytoy kalpasan a nakita dagiti otoridad a nakaparking ti nasao a lugan iti paset ti Barangay 23 ditoy ciudad ti Laoag ngem awan ti agtagikua.
Awan ti nakita dagiti otoridad nga illegal a banag iti uneg ti lugan malaksid laeng kadagiti dokumento a pakabigbigan ti agtagikua iti daytoy.
Nupay kasta, nagkedked paylaeng dagiti otoridad a nangipaay ti naan-anay a detalye mainaig iti kinatao ti akinbagi iti lugan.
Immuna iti daytoy, nagsagaba ti sugat iti bibig ti maysa a babai babaen kadagiti nabuong a sarming ti lugan na kalpasan a pinaltogan dagiti dua a lallaki iti San Nicolas-Paoay Road, bisinidad ti Barangay 17 iti ili ti San Nicolas.
Bingbig ni PCapt. Ashley Cacayorin, ti deputy chief of police iti ili ti San Nicolas ti biktima nga agtawen ti 28, awanan ti asawa, negosyante ken operation manager iti sand dunes.
Kuna ni Cacayorin a basar iti inisyal a panagimbestigar da, agpaamyanan ti biktima a nakalugan ti Geely Coolray nga agmaris ti white ken naggapo iti pagtaengan na iti Brgy. 18 iti nasao nga ili.
Nu pay kasta, inpakaammo na nga idi nakadanon iti nakapasamakan ti insidente ket immabay kenkuana dagiti dua a lallaki a nakalugan ti Metallic Gray Innova ken pinaltogan da iti batog na iti naminsan a daras.
Kabayatanna, inbatad na a nakaliklik ti biktima manipod iti tama ti bala ti paltog ngem nasugatan ti bibig na gapo iti nabuong a sarming ti lugan na.
Segun ken ni Cacayorin, kalpasan ti pammaltog ket dagus a pinataray ti biktima ti lugan na ken sinurot dagiti suspek ngem idi nakadanon iti residential area iti Barangay 17. Sta Asuncion ket simrek kadagiti balbalay tapno agpasalakan no sadinno a dagiti met suspek ket naglibas a dagus kalpasan ti insidente.
Kabayatanna, inpakaammo ni Cacayorin nga apaman a naiyuswat ti hot pursuit operation ket immunan a nabirokan ti inusar a lugan dagiti suspek ken addan dagiti nadeterminar a person of interest iti nasao a pammaltog.
