LAOAG CITY – Temporario a naipasardeng pay laeng ti maar-aramid a drainage canal kalpasan a nagaburan ti tallo a construction worker iti likud a paset ti Plaza del Norte and Convention Center a sakupen iti Barangay Balacad ditoy siudad ti Laoag.
Segun iti Laoag City Police Station, nabigbig dagiti natay nga isuda Christian Mark Velasco, agtawen ti 41, awanan asawa ken residente idiay Isabela ken Christian Juanitez Lestino, agtawen ti 32, awanan asawa ken residente idiay Pasig City idinto a nabigbig met ti naisalakan a ni Rebecca Beltran, agtawen ti 36, awanan asawa ken residente idiay Batangas.
Basar iti inwayat nga imbestigasion dagiti otoridad, nakita ti Project Engineer a posible a saan a naripar dagiti construction worker ti tubo ti danum nga adda iti uneg ti daga a pagkalkalian dagiti maseknan.
Gapu iti daytoy, natukkol ti tubo a rason ti panagparsiak ti danum a nangitunda ti panaglukneng ti daga iti uneg agingga a nagreggaay daytoy.
Naammoan nga adda ti 2.5 a metro ti kauneg iti nakagaburan dagiti biktima.
Mainaig iti daytoy, mabalin nga agpila ti reklamo ti pamilia dagiti biktima kontra iti mangimatmaton iti maar-aramid a drainage canal.
Kabayatanna, manamnama a maibiahe ti bangkay ti dua a biktima idiay Isabela ken Pasig City idinto a manarimaan pay laeng nga agpapaimbag iti Mariano Marcos Memorial Hospital and Medical Center iti siudad ti Batac ti nakalasat iti nasao nga aksidente.
Maipalagip a nagaburan ti tallo a construction worker kabayatan ti maar-aramid a drainage canal no sadinno dua kadagitoy ket pimmusay.
