LAOAG CITY – Inrakurak ni Mr. Ferdinand Felipe, ti Sanitation Inspector iti lokal a gobierno iti ili ti Dingras nga adda ti sumagmamano a nalabsing a pagannurutan ti piggery farm a kukua da Mr. Elpidio Yapo ken Mrs. Irene Yapo iti Barangay Cali iti nasao nga ili.
Kuna na a karaman kadagiti nakita da a nalabsing ti piggery farm ket ti kaadda ti dua a tubo a pagruwaran ti danom iti septic tank gapu ta maibilang daytoy kas improper solid waste.
Malaksid iti daytoy, napaneknekan da a pudno ti reklamo a nakaro ti kinabangsit ti nasao a piggery farm isut gapuna nga inikkan da ti sanitation ticket mainaig kadagiti penalty da gapu kadagiti nalabsing da iti municipal ordinance.
Innayon na nga adda pay ti inbilin da nga ikorehir na iti sanitary order, ngem no saan nga agcomply dagiti maseknan ket isunton ti panagplano da no ania ti sumaruno nga addang da, ngem maysa kadagiti aramiden da ket ipakaammo daytoy a banag iti Department of Environment and Natural Resources (DENR).
Inpaganetget ni Felipe a no agipatakder ti piggery farm ket masapol a kitaen ti responsibilidad idi aglawlaw, karruba ken iti gobierno tapno awan ti maapektaran.
Mainaig iti daytoy, inpetteng ni Felipe a kadagiti koma met agiparparuk-at ti Environmental Compliance Certificate (ECC) ket masapol a kalpasan ti 5 a tawen wenno 10 a tawen ket mapan da inspeksyunen dagiti nakaipaayan ti sertipikasyon tapno masigurado no agtultuloy ti panagcomply da kadagiti requirements a kasapulan para kadagiti agtartaraken ti baboy.
Kabayatanna, kuna ni Felipe a no bilang saan latta nga agcomply dagiti maseknan kadagiti naibilin nga ikorehir da ket pagsasaritaan da a nasayaat ti ipatungpal da nga addang para iti pannakasolbar ti nasao nga isyu.
Immuna iti daytoy, inpetteng met ni Mrs. Irene Yapo, ti akinkukua ti piggery a gagangay laeng nga adda ti saan a makaay-ayo nga angot iti maysa a piggery.
Nupay kasta, patien na a kadagitoy met laeng a rimsua ti problema gapu iti napigsa nga angin nga agturong iti abagatan nga isu ti ayan dagiti babbalay.
Kunana pay a ti us-usaren da a feeds ket adda odor eraser na isu a kontrolado ti nabangsit nga angot.
