LAOAG CITY – Awan pay ti pamal-palatpatan dagiti opisyal iti Barangay 1, San Lorenzo no siasinno ti napa nangibati iti maysa a maladaga a lalaki iti sango ti balay iti nadakamat a barangay.
Naamoan a naidisso lattan ti maladaga nga awan pulos ti arwaten na iti ayan dagiti tsinelas ti nasao a pagtaengan.
Daytoy ti inbatad ni Barangay Kagawad Darwin Domingo, ti chairman ti Committee on Social Services iti Barangay 1 ditoy ciudad.
Inlawlawag ni Domingo nga iti pannakarebisar ti CCTV camera a naimuntar iti lugar ket awan pulos ti nakita uray koma anniniwan ti tao.
Kuna na a possible a kabisado ti napan nangibati iti maladaga ti lugar ken ammo na ti liniklikan na kangrunaan na ti CCTV camera.
Inpakaammo na a naimbestigar aminen dagiti masikog iti nasao a barangay ngem awan kadakuada ti agpasngay ita a bolan.
Kuna pay ni Domingo a kalikagom dagiti akin-balay ti nakaidisoan ti maladaga nga isuda laengen ti mangampon iti ubing ngem inbaga ti City Social Welfare and Development Office (DSWDO) ditoy ciudad nga agaplikar laengen dagiti maseknan ngem saan pay a masigurado no isuda ti pakaitedan na, agdepende iti agbalin a desisyon ti nasao nga opisina.
Iti agdama ket addan iti nasayaat a kasasaad ti maladaga ken manamnama ti pannakaipadalan na ti swab test tapno masigurado a natalged ti salun-at na.
Kabayatanna, agtultuloy met ti imbestigasyon dagiti kameng ti Philippine National Police (PNP) ditoy ciudad ti Laoag tapno maamoan no siasinno ti ina ken napan nangibati ti maladaga iti nasao a lugar.
