LAOAG CITY – Nabirukanen ti eroplano a nagluganan ni Vice President Saulos Chilima ken ti siyam a sabsabali pay idiay Malawi.
Kinumpirmaran ni President Lazarus Chakwera nga agpapada a pimmusay dagiti nakalugan iti Malawi Defense Force aircraft.
Inpakaammo ti presidente a nagpatpatnag a nabiruk dagiti soldado agingga a nabirukan da ti eroplano a nagluganan ti grupo ti bise presidente.
Indanun a dagus ti presidente ti pannakipagladingit na iti pamilya dagiti biktima.
Innayon ti presidente nga arigna awan ti nagbalbalinan ti eroplano gapu iti nakaro a pannakadadael na.
Naulila ni Vice President Chilima ti asawa na a ni Mary ken dagiti dua nga annak da nga isuda Sean ken Elizabeth.
Maipalagip nga idi 2022 ket natiliw ni Chilima gapu iti alegasyon a nagawat ti pasuksuk ngem iti laeng napalabas a bolan ket inbasura ti korte iti saan a masinunuo a rason.
