LAOAG CITY – Nagpositibo iti drug test ti naarestar a mannalon a ni Amos Jose Agdigos, agtawen ti 61, naasawaan ken residente ti Barangay Cal-laguip iti ciudad ti Batac.
Daytoy ti inbatad ni Police Lt. Col Adrian Gayuchan, ti chief of police iti ciudad ti Batac.
Ni Agdigus ket naarestar iti naisayangkat nga Anti-Illegal Drug Buy-bust Operation iti Barangay Bil-loca iti siudad ti Batac.
Malaksid iti maysa a sachet a naglaon ti maatap a shabu nga inlako ti suspek iti maysa a police poseur buyer, nakumpiskar pay kenkuana ti 12 a pedaso nga small transparent heat-sealed plastic sachet a naglaon metlaeng ti mapapati a shabu, maysa a black pouch bag, maysa a brown paper bag, tallo a live ammunition ti caliber .45; innem a boodle money; maysa a black pocket knife ken maysa nga one thousand peso bill a nausar kas buy-bust money.
Kabayatanna, naipursige ti naipila a kaso a panaglabsingna iti Republic Act 9165 wenno Comprehensive Dangerous Drugs Act of 2002 kontra iti suspek idinto a naibasura ti kaso a panaglabsing iti Republic Act 10591 wenno Comprehensive Firearms and Ammunition Regulation Act.
Iti agdama, nagtalinaed ti suspek iti Philippine National Police iti ciudad ti Batac ken maiyur-uray ti commitment order na para iti pannakaipisok na iti Bureau of Jail Management and Penology (BJMP) iti nasao a ciudad.
