LAOAG CITY – Kalikagom ni Mayor Mike Hernando iti ili ti San Nicolas nga insigida a masolbar ti kaso ti pammaltog iti ili da.
Segun kenkuana daytoy ti rason no apay nga adda ti indiaya na 300,000 a pisos a gungguna kadagiti makaitudo no siasinno dagiti adda iti likudan iti panangpapatay ken ni Barangay Chairman Francisco Bagay Jr. iti Brgy. 5 iti nasao nga ili.
Inlawlawag na a ti gatad ket aggapu a mismo iti bulsa na sipud ta saan met a mabalin nga usaren ti pondo ti lokal a gobierno mainaig iti daytoy a banag.
Kunana marikna na ti panagladingit ti pamilya ti biktima nangruna ket ubbing pay dagiti annak ti nasao a Kapitan.
Innayonna a masapul a maikkan ti hustisya dagiti kakastoy a krimen ken kaso.
Maipalagip a natay ni Kapitan Bagay Jr. kalpasan a napaltu-paltogan iti uneg ti solar-da iti Barangay 5 iti ili ti San Nicolas no sadinno a nagsagaba ti naruay a tama iti bala ti paltog.
