LAOAG CITY – Nangidiaya ni Mayor Mike Hernando ti 300 a ribu a pisos a gungguna ti asinoman a makaitudo ti adda iti likudan iti panangpapatay ken ni Barangay Chairman Francisco Bagay Jr. iti Brgy. 5 iti ili ti San Nicolas.
Daytoy ti inpakaammo ni P/Maj. Reginaldo Dalipias Jr., dati nga Hepe ti San Nicolas Municipal Police Station.
Mainaig iti daytoy, segun ken ni P/Col. Frederick Obar, Provincial Director ti Ilocos Norte Police Provincial Office nga adda ti lima nga indibidual nga ibilangda kas person of interest a posible nga akin-aramid iti nakaam-ames nga insidente.
Maipalagip a natay ni Kapitan Bagay Jr. kalpasan a napaltu-paltogan iti uneg ti solar-da iti Barangay 5 iti ili ti San Nicolas no sadinno a nagsagaba ti naruay a tama iti bala ti paltog ti agtawen iti 45 a Kapitan ken naitaray iti Black Nazarene Hospital ngem pimmusay kabayatan a maag-agasan.
Immuna iti daytoy, basar iti Closed Circuit Television wenno CCTV camera a nakaimuntar iti asideg ti balay ti pamilia Bagay, dagiti nangpaltu-paltog iti nasao a Kapitan ket riding-in tandem a naglugan ti motorsiklo.
