LAOAG CITY – Sinungbatan ni Mayor Michael Marcos Keon ti nagbalin a rakurak ni Vice Mayor Rey Carlos Fariñas nga isuna ket agple-play safe maipanggep iti napasamak iti Brgy. 33-C, Lapaz ditoy siudad ti Laoag.
Segun kenkuana, napan iti opisinana dagiti maseknan a menor de edad pakairamanan dagiti nagannak kadakuada kalpasan a nagturongda iti Sangguniang Panlungsod no sadinno nakasarsaritada ni Vice Mayor Fariñas.
Inbatadna a basar iti pannakisarsaritana met kadagiti maseknan ket kalikagumda pay a mangipila ti kaso iti Korte.
Inlawlawagna a kanununganna dagiti nasao a pamilia gapu ta ammona a saan a nasayaat ti inaramid ni Brgy. Chairman Rod Norman Martin iti panangdangran kadagiti menor de edad.
Mainaig iti daytoy, inpetteng ni Mayor Keon a saanna nga inyendorsar dagiti menor de edad iti Sangguniang Panlungsod maikanniwas iti irakrakurak iti sabali nga estasion gapu ta immunan a napanda iti konseho.
Maipalagip a nadangran dagiti nadakamat a menor de edad gapu iti panangdanog ni Kapitan Martin kadakuada a nangitunda ti pannaka-trauma dagitoy iti napasamak.
