LAOAG CITY – Inbutaktak iti Bombo Radyo Laoag ni Atty. Ferdinand Ignacio, legal counsel ni Vice Mayor Francis Espiritu iti ili ti Dumalneg nga adda ti maysa a bokal a timmawag iti bise mayor a maipagarop a dumawdawat ti 200 agingga ti 300 a ribo a pisos tapno saan a masuspenso.
Inaramid daytoy ni Ignacio kalpasan ti pannakaiserbi ti 60-day preventive suspension kontra iti kliyente na a ni Bise Mayor Espiritu.
Iti eksklusibo nga interview ti Bombo Radyo Laoag ken ni Ignacio, inbaga na a nangngeg na a mismo ti panagtawag ti bokal ken ni Espiritu gapu ta iti dayta a gundaway ket naka-teleconference da iti bise mayor.
Kuna pay ni Ignacio a ti panagawat na ket saan laeng a ti timmawag a bokal ti masapol a bayadan na no di ket isu amin a kameng ti junta probinsyal.
Nupay kasta, kuna ni Ignacio a ti bise mayor ti makaibaga laeng no siasinno ti timmawag kenkuana a bokal.
Maipalagip a namonganay ti kaso kontra ken ni Vice Mayor Espiritu kalpasan ti maipagarop a panangdangran na ti maysa a residente iti ili ti Dumalneg a ni Francis Zuniga.
Kabayatanna, inpetteng ni Vice Mayor Francis Espiritu iti ili ti Dumalneg nga adda ti maris pulitika na ti naipataw kenkuana a 60-day preventive suspension babaen iti Sang Panlalawigan.
Daytoy ket gapu ta saan nga immanugot iti demand da kenkuana nga agbayad ti 300 a ribo a pisos iti kada bokal no sadinno a kayat da pay nga iraman ti bise gobernador.
Inbaga ni bise mayor Espiritu nga idi kinasarita ti maysa a bokal mainaig iti panagbayad na tapno saan a matuloy ti pannakasuspenso na ket saan nga imannugot.
Inkalintegan na nga awan ti rason tapno agbayad ken awan ti mapukaw na uray no masuspenso gapu ta adda man wenno awan ti pandemya ket nakasagana da latta nga agasawa a tumulong kadagiti kailian da.
Inpalgak pay ni Espiritu nga idi adda ti immuna a nakainaigan na nga isyu mainaig iti panag-quarry da iti ili ti Solsona ket dinawatan da ti 3-milyon a pisos no sadinno nga indanun na daytoy a banag ken ni Governor Matthew Marcos-Manotoc.
Innayon na a ti nangawat ti 3-milyon a pisos ket ni Sang Panlalawigan Member Domingo Ambrocio iti mismo a restaurant ti bokal.
Kuna pay ti bise mayor a daytoyen ti maikadwa a panangdawat da kenkuana ti dakkel a kantidad ngem saan nga immanugot.
Inpasingked met ni Bokal Ambrocio a sungbatan na dagiti inbutaktak ni bise mayor Espiritu intono bigat iti programa met laeng a Zona Libre.
