LAOAG CITY – Nagsurat ti maysa a concern citizen ti Open Letter para ken ni Presidente Ferdinand Bongbong Marcos Jr. kalpasan a nangibati ti panagamak ken panagbuteng dagiti residente iti ili ti San Nicolas gapu iti dua a nakaam-ames a pammaltog a nakatayan dagiti dua a Kapitan ken dua a sibilian.
Nailanad iti surat nga adda dagiti sumagmamano a Kapitan iti ili ti San Nicolas ti makaaw-awat ti pangta iti biag a nangitunda ti panagdanag dagiti residente ken dagiti lokal nga opisial.
Maikidkiddaw ken ni Pres. Marcos ti pannakaisubli ti linak, urnos ken talna iti ili ti San Nicolas gapu iti nagsaruno a napasamak a krimen.
Maipalagip nga immuna a napapatay kalpasan a napaltu-paltogan ni Barangay Chairman Francisco Bagay Jr. ti Brgy. 5 iti ili ti San Nicolas idi Setiembre idinto nga ita laeng a bulan ti Oktubre ket napaltu-paltogan a puon ti nakatayan da ABC President Mark Adrian “Macky” Barba pakairamanan dagiti dua a bodyguard-na.
Iti agdama, agtultuloy pay laeng ti iwaywayat a naun-uneg nga imbestigasion dagiti otoridad maipanggep iti nasao nga insidente.
