LAOAG CITY – Sumango iti agsusukot a kaso ni Barangay Chairman Jimmy Pablo iti Barangay Cacafean, Marcos, Ilocos Norte.
Daytoy ket mainaig iti pannakapaltog a puun ti nakatayan ni Police Corporal Wilbert Rarogal Jr., agtawen ti 32, residente idiay Barangay Santiago, Marcos, ken agdama a nakabakasyon ngem nakadestino idiay Ifugao.
Segun kenni Police Capt. Johnveil Maramag, ti chief of police iti ili a Marcos, pilaan da ti kaso a 1 count ti murder, 4 counts ti attempted murder ken panaglabsing iti Omnibus Election Code.
Inlawlawag ni Maramag a ti motibo iti nasapamak a krimen ket road rage gapo ta maipagarop nga adda ti nakalugan iti tricycle a grupo ti biktima a dandani nangkugtar iti nagluganan a motorsiklo ni Pablo ken adda ti lubbon na nga armado a lalaki ken isu ti maitudtudo a gunman.
Gapo iti daytoy, nagsardeng dagiti lugan ti biktima ket ni Pablo ken nagsarita dagitoy ngem saan a ninamnama ti kapitan a paltogan ti inlubbon na ni Rarogal.
Linawlawagan ni Maramag ti ummunan a naireport nga aggapo iti karayan ti grupo ti biktima ngem ketdi ket naggapo da iti minatayan iti Barangay Santigao idinto a da Pablo ken sumagmamano pay a kakadwa na a kapitan ket naggapo da iti meeting iti kandidato a para-mayor iti nasao nga ili.
Rumrumwar a nakainom ti grupo ti biktima idi mapasamak ti pammaltog.
Kabayatanna, inpetteng ni Pablo a saan na nga am-ammo ti inlubbon na.
Inbatad ni Police Capt. Johnveil Maramag, ti chief of police iti ili a Marcos nga iti panangim-imbestigar da kenni Pablo ket nagtalinaed ti takder na a saan nga am-ammo ti inlubbon na.
Kinumpirmaran pay ni Maramag nga idiay Barangay Sto, Niño, Nueva Era ti nakatiliwan da kenni Pablo.
Malaksid iti 13 a kapsula ti 9MM ken maysa a bala ti 9MM ket narekobre da pay iti nakapasamakan ti krimen ti 9MM a paltog a na-issue kenni Rarogal .
Segun kenni Maramag, posible a nakasubbot ti biktima.
Iti agdama, nagtalinaed iti kustudiyar ti PNP-Marcos ti kapitan bayat ti panagtultuloy ti naiget nga imbestigasyon iti napasamak a pammaltog.
