LAOAG CITY – Nabigbigen dagiti otoridad ti maysa kadagiti dua a suspek iti napasamak a pammaltog iti Barangay Garreta iti ili ti Badoc.
Daytoy ti inpakaammo ni Police Capt. William Sotelo, ti chief of police iti ili ti Badoc ngem nagkedked paylaeng a mangipaay ti naan-anay a detalye maipapan iti kinatao ti maseknan.
Segun pay ken ni Sotelo, manarimaan ti panangiproseso da kadagiti kasapulan a dokumento para iti pannakaipila ti kaso kontra kadagiti suspek ngem kuna na a maipila laengen ti kaso babaen iti regular filing.
Mainaig iti daytoy, inpalgak ni Sotelo nga aramiden da amin tapno mabigbig ti kinatao ti maysa pay a suspek.
Maipalagip a pimmusay ni Jojo Delos Santos y Talibugen, naasawaan, maysa a laborer ken residente iti Brgy. Uguis iti ili ti Nueva Era kalpasan a napaltu-paltogan babaen metlaeng iti maysa manipod kadagiti dua nga inlubbon na iti motorsiklo bayat ti kaadda da iti Barangay Garreta iti ili ti Badoc.
Basar iti doctor a nangtaming iti biktima ket adda ti innem a tama ti paltog a sinagaba na no sadinno a maysa iti barukong, dua iti likud ken ima ken nadamgiasan pay ti ulo na.
Immunan nga inbatad ni Police Capt. Sotelo nga ado dagiti kitkitaen da nga anggulo iti pannakapaltog ti biktima no sadinno a maysa ditoy ket ti possible nga adda ti pannakainaig na iti dati a kaso na nga attempted murder idiay Abra a napasamak idi December 16 2019, ngem nakapaniansa daytoy idi December 24, 2021 rason a nawaya-wayaan.
Malaksid iti daytoy, kuna ni Sotelo a mabalin nga adda pay ti pakainaigan ti nakita da a maipagarop a shabu iti ikot ti biktima wenno ti maipagarop a panagbalin a miembro iti gun for hire ti nasao a biktima.
Innayon ti opisyal a basar kadagiti narekobre a kapsula iti nakapasamakan ti krimen ket maipagarop a kalibre 45 a paltog ti nausar.
