LAOAG CITY – Nawaya-wayaanen ni Albert Balbas, agtawen ti 58, naasawaan, residente iti Brgy. 23 ditoy siudad ti Laoag, ti maysa kadagiti dua a natiliw a gun runner iti paset ti Barangay 2 ditoy ciudad.
Daytoy ti inbatad ni Police Major Romnick Subia, ti mangidadaulo ti PNP-CIDG ditoy probinsya.
Segun ken ni Subia, pinaluspusan dan ni Balbas kalpasan a nakapagpiyansa ti 300 ribo a pisos para iti kaso na a panaglabsing iti Republic Act (RA)10591 wenno ti Illegal Possession of Firearms and Ammunitions idinto a nagpiyansa met ti 80 ribo a pisos para iti kaso na a panagsalungasing iti Omnibus Election Code.
Kabayatanna, inlawlawag ni Subia a ti kadwa ni Balbas a ni Leo Ortega Tumang, agtawen ti 47, residente iti Batasan Hills, Quezon City ket nagtalinaed iti kustodyar ti PNP-CIDG gapu ta saan pay a nakabayad ti piyansa na.
Mainaig iti daytoy, inpakaammo ni Subia a ti inpila da nga Usurpation of Authority kontra kada Subia ken Tumang ket inbasura ti korte gapu ta awan ti umdas nga ebidensya nga inusar da ti NBI para iti illegal nga aktibidad da gapu ta dagiti suspek ket dati nga NBI agents.
Maipalagip a nakumpiskar manipod kada Balbas ken Tumang ti dua nga unit ti bushmaster cal 223-5.56mm, dua a plastic ti magazines ken 40 a pedaso ti bala para iti cal 5.56.
Immuna iti daytoy, kuna ni Subia a basar iti naun-uneg a panagimbestigarda ket maipagarup a politiko dagiti kangrunaan a katransaksyon dagiti suspek.
