LAOAG CITY – Nabigbig ken natiliwen dagiti kameng ti Philippine National Police (PNP) ti maysa kadagiti suspek iti pannakapaltu-paltog a nangitunda ti pannakatay ni Engr. Rolando Magdirila y Constantino, agtawen ti 60,residente iti Brgy. 6 ditoy siudad ti Laoag.
Daytoy ti kinumpirmaran ni Police Lt. Col. Mar Louise Bondoc, ti chief of police ditoy ciudad.
Binigbig ni Bondoc ti natiliw da a ni Edilberto Sebastian Bala Jr., agtawen ti 50, naasawaan, dati a nakasoan ti panaglabsing iti Republic Act (RA) 9165 wenno Comprehensive Dangerous Drugs Act of 2002 idi 2015 ken residente iti Brgy. Hilario iti ili ti Banna.
Inlawlawag na a mismo a ti maysa a testigo iti pammaltog ti nangitudo ken ni Bala a daytoy ti nangiturong iti motorsiklo no sadinno a ti gunman nga inlubbon na ket saan da pay a nabigbig.
Kuna ni Bondoc a nabigbig ti testigo ni Bala gapu ta inikkat na ti helmet na idi napanda imminom ti softdrinks iti maysa a refilling station nga asideg iti nakapasamakan ti pammaltog.
Innayon na a gapu ta adda ti dati a kaso ni Bala ken adda ti ladawan ken rekord na iti opisina da rason nga alisto a nabigbig ti testigo.
Inpakaammo ni Bondoc nga agtultuloy ti pananggutigot da ken ni Bala nga itudo ken bigbigen na ti kadwa na a nangpalto-paltog a misamo iti biktima, ken no adda man ti mastermind wenno nangbaon kadakuada tapno mairaman da a makasoan.
Mainaig iti daytoy, kuna ni Bondoc a tallo nga anggulo ti kitkitaen da a motibo, karaman ditoy ti love tiangle, panagpapautang ti biktima ken susik iti nakaipatakderan ti refilling station.
Nupay kasta, kuna ti hepe ti pulisya a ti laeng mismo a pamilya ti biktima no ania kadagiti kitkitaen da a motibo ti pudno a makaigapu iti nangpapatayan da iti nasao nga inhinyero.
Maipalagip a kabayatan ti panagdaldalyasat ti biktima a nakamotorsiklo iti paset ti Rizal St. iti Brgy 1 ditoy ciudad ti Laoag idi rabii ti domingo, disyembre 26 ket kellaat lattan a napaltu-paltugan a nagsagabaan na ti sumagmamano a sugat nangitunda iti ipapatay na.
Iti agdama, nagtalinaed ni Bala iti kustodyar ti PNP-Laoag ken ginandat met ti Bombo Radyo Laoag nga alaen ti kabibiangan na maipanggep iti nakainaigan na a krimen ngem nagkedked daytoy a nagpainterview.
