LAOAG CITY – Maladingitan nga inyestoria ti menor de edad a barito nga agtawen iti 16 a residente iti Brgy. 32-B ditoy siudad ti Laoag ti maipagarup a panangdangran kenkuana ni Brgy. Chairman Rod Norman Martin.
Inbatadna a na-trauma ti napasamak kenkuana nangruna ket awan met ti ammona a basolna tapno dangrangna isuna.
Inlawlawagna a kabayatan nga agtutugaw iti paset ti Fish Port iti Brgy. 33-B, Lapaz ditoy siudad ti Laoag kaduana dagiti kaklase ken kasinsinna idinto a sumungad ni Kapitan Martin kaduana ti kabsatna nga agnagan ti Lito a nakaluganda ti kurong-kurong.
Inpalgakna nga inasitgan ti Kapitan ti kaklasena a babai ket ditoy a kinasarsaritana ken maipagarup nga intudutudona pay kagiddan ti panagsasaona ti dakes.
Kunana nga idi makitana ti ar-aramiden ni Kapitan Martin iti kaklasena ket napugkawanna ti Kapitan nga isu metten ti rason iti panangdanug-danog ti Kapitan kenkuana.
Mainaig iti daytoy, segun iti menor de edad nga adda met dagiti barangay tanod a kadua ni Kapitan Martin ngem saanda pulos a naganawa.
Innayonna a ginandatda pay nga itennag isuna iti Fish Port ngem insalakan isuna ti maysa a babai.
Kabayatanna, inpakaammo ni dati a Kapitan ti Brgy. 33-B Lapaz ditoy siudad ti Laoag a ni Ms. Alma Martin a napanna inasitgan ti agdama a Kapitan tapno anawaen.
Inpettengna a saan a napintas ti inaramid ti maseknan a Kapitan isu a masapol a maaramid ti umiso nga addang maipapan iti daytoy a banag.
