LAOAG CITY – Inbatad ni Barangay Chairman Alywin Martin iti Barangay 2, Sta. Joaquina ditoy ciudad ti Laoag nga awan ti madi a rekord da iti menor de edad a lalaki a nangbagko-bagkong iti bukodna nga ina iti barangay da.
Kuna na a ti laeng malagip na ket adda ti panagtalaw ti menor de edad iti balay da iti napalabas a tawen kalpasan nga inungtan ti ina na.
Patien ti kapitan a mabalin a kinagura ti menor de edad ti panangsermon kenkuana ti ina na kalpasan a maipagarop a nagcutting-class daytoy.
Iti agdama, nagtalinaed ti nasao a menor de edad iti sidong ti City Social Welfare and Development ditoy ciudad ti Laoag idinto a ti ina na ket agpapaimbag paylaeng iti ospital.
Maipalagip a nagsagaba ti dua a sugat iti buksit ken maysa iti baba ti akin-kannigid a paset ti barukong ti biktima kalpasan a binagko-bagkong ti anakna kalpasan a maipagarop a binagbagaan na daytoy nga agadal a nasayaat ken saan unay a makibarbarkada.
