LAOAG CITY – Saan pay a naestablisar ti Philippine National Police (PNP) ti motibo iti pannakapaltu-paltog a nangitunda ti pannakatay ni Konsehal Apolonio Medrano iti ili ti Sarrat.
Daytoy ti inbatad ni Provincial Director Police Col. Christoper Abrahaho.
Segun kenni Abrahano, maamoan da laeng ti motibo iti krimen no matiliw danton dagiti suspek nga immunan a napilaan ti kaso.
Inpakaammo ni Abrahano a dagiti napilaan ti kaso ket dagiti dua a naglubbon ti motorsiklo no sadinno a maysa kadagitoy ti nangpaltu-paltog ken ni Konsehal Medrano.
Inbatad na a saan da met nga iwalin iti imbestigasyon da ti anggulo a possible a riri wenno pulitika ti rason iti pannakapapatay ni Medrano.
Innayon na a karaman pay nga itultuloy da nga imbestigaren ket no siasinno ti mastermind iti krimen.
