LAOAG CITY – Inpakaammo ni Mrs. Jojami Alcid, asawa ni Bryan Alcid a maysa kadagiti agpaidasig a konsehal ditoy siudad ti Laoag ti napasamak kabayatan ti panangserrek ti team Fariñas iti compound da.
Iti inyuswat a press conference ti Team Marcos babaen ken ni Alcid ken ni Bise Mayor Vicentito Lazo, inpakaammo ni Mrs. Alcid nga apaman a napan iti bodega da ket nadanon na ni dati a mayor Roger Fariñas.
Inbatad na a saan na a masinunuo nu apay a simrek ti dati a mayor ken addati birbiroken na a dokumento ken kalikagum na a maala.
Kuna na a ginandat na a saludsuden ti panggep ni dati a mayor Fariñas iti compound da sakbay a makapanaw dagitoy ngem arig a nadangran laeng.
Inbatad na nga agpada a ginammatan ni dati a mayor Fariñas ken ni konsehal Raffy Fariñas ken adda ti naiduron agingga a naipatugaw.
Inpakaammo na nga adda pay dagiti nagkugtar kenkuana pakairamanan ti cellphone na.
Maipalagip a basar iti immunan a palawag ni Bryan Alcid, timmawag ti asawa na bayat nga agkamkampanya gapu iti panangserrek ni dati a mayor Roger Fariñas iti compound da.
Dagus met a dimmawat ti tulong ken ni Bise Mayor Lazo nga isu ti nakaengwentro ti team Fariñas iti boundary ti Brgy. Mangato A ken B idi nakapanaw da iti compound da Alcid.
Dita nga adda ti nagbalin a nabara a sinnungbat iti nagbaetan ni dati a mayor Fariñas ken ni bise mayor Lazo.
Mainaig daytoy, dua a lalaki a nakasibilyan a maipagarup nga armado dagiti rimuar iti lugan iti Team ni Lazo ken maipagarop nga insawang dagitoy a mabalin da a paputukan ti grupo ti Fariñas.
