LAOAG CITY – Inpakaammo ni Police Leutenant Francis Sean Bagaoisan, ti Philippine National Police (PNP) Laoag Traffic Division a mabalin a mapilaan ti kaso dagiti nagannak kadagiti menor de edad a karaman ti maipagarup a panaglulumba iti Barangay Balacad ditoy siudad ti Laoag.
Inbatadna nga amin dagitoy ket adda helmet-da ngem gapu iti kinapaspasda a nagpataray isu a napigsa ti impact-na ket isu ti gapu na a nakaro ti sinagabada a nangitunda ti ipupusayda.
Segun kenkuana, manarimaan pay laeng ti imbestigasion no nakainom dagitoy a makitanto iti medical examination-da.
Innayonna a dagiti kadwa da a menor de edad ket mabalin pay a mapilaan ti pannusa wenno penalty.
Maipalagip a natay dagiti menor de edad kalpasan a maipagarup a naglulumba iti paset ti Laoag-Suba-Paoay Road iti Barangay Balacad ditoy siudad ti Laoag.
Basar iti inisial nga imbestigasion, agpa-abagatan ti driver ti Yamaha Mio idinto nga agpa-amianan ti driver ti Suzuki Raider no sadinno nga apaman a nakadanonda iti nakapasamakan ti insidente ket immagaw iti linya ti kalsada ti driver ti Yamaha Mio a nangitunda ti panagdinnungparda iti sumungsungad a driver ti Suzuki Raider.
Daytoy ti gapu na a naitaray ti dua a biktima iti Governor Roque B. Ablan Sr. Memorial Hospital para iti naan-anay a pannakatamingda ngem naideklarar a dead on arrival babaen ti attending physician a ni Dr. Hency Thea Agngarayngay.
