LAOAG CITY – Naipilan iti piskalya ti reklamo kontra kadagiti nagannak dagiti dua a menor de edad a pimmusay iti napasamak a desgrasya itay kallabes idiay Barangay Magnuang iti ciudad ti Batac.
Daytoy ti kinumpirmaran ni Police Major Allan Emerson Dauz, ti chief of police ti PNP-Batac.
Segun kenni Dauz, daytoy ket gapo iti panagipalubos da kadagiti annak da a menor de edad nga agiturong ti motorsiklo ken mabalin a sumango dagiti maseknan ti makabulan ken maysa nga aldaw agingga iti innem a bulan a pannakabalod.
Inlawlawag na a naduktalan da nga ammo dagiti nagannak nga agiturturong ti motorsiklo, maikadwa ket no siasinno ti akinkukua ti ginatang na a motorsiklo, ken ti maikatlo ket rumbeng kuma nga naidulin ti tulbek tapno saan a maala ti anak da ti motorsiklo.
Inbatad na a basar ti palawag ti maysa kadagiti nagannak ti menor de edad ket saan na nga ammo nga innala ti anak na ti tulbek ti inusar na a motorsiklo.
Naamoan a daytoy ti kaunaan a gundaway nga adda ti naipilan ti kaso a nagannak idiay ciudad ti Batac mainaig iti panangipalubos da ng agiturong dagiti annak da ti motorsiklo.
