LAOAG CITY – Inpakaammu ni P/Cpt. Ashley Cacayorin hepe ti Philippine National Police iti ili ti Banna a kitkitaenda amin nga anggulo a mabalin a maikonektar iti napasamak a pammaltog iti Barangay Tabtabagan iti ili ti Banna.
Segun ken Cacayorin, ti maysa kadagiti kitkitaenda a motibo iti pammaltog ken ni Isaac Casay alyas “Bigso” ket gapu iti utang, gapu ta apaman ti pannakisarsarita da iti kameng ti pamilya na ket adda dagiti iyis-isturya ti biktima a pangta iti biagna.
Inpakaamu pay ni Cacayorin a basar iti rekord da ket naruay dagiti paka-ibilangan ni Casay a shooting incident, no sadinno a nakasoan pay daytoy ti murder idi 2009 iti ili ti Nueva Era gapu iti pannaka-inaigna iti pammapatay ken ni dati a Ilocos Norte Electric Cooperation General Manager Lorenzo Ruiz.
Malaksid itio daytoy, natiliw pay isuna gapu iti illegal a panagikut ti paltog rason no apay a maibilang ni Bigso kas dangerous individual.
Mainaig iti daytoy, inlawlawag ni P/Capt. Cacayorin nga iti CCTV footage nakita a naggapu ti biktima iti amianan ken maipagarup a napan nagdeliver iti karne ti ugsa agturong iti daya a paset ti Barangay Tabtabagan, Banna idi kellaat nga adda nangsurot kenkuana a riding in tandem.
Iti agdama, iyur-uray da ti resulta iti verification ti paltog a narekobre manipud iti biktima no nakarehistro met laeng daytoy.
Kabayatanna, agpapan ita ket awan pay ti timmakder a witness seknan iti napsamak a pammaltog, ken mannarimaan pay laeng a maiyur-uray ti medico legal na tapno maamwan no mano ti tama na.
Maipalagip a natay ni Isaac Casay alyas “Bigso”, agtawen ti 54, gapu iti pannakapaltu-paltog kenkuana iti Barangay Tabtabagan iti ili ti Banna ken patien dagiti kameng ti pulisya a saan laeng a maymaysa ti suspek iti pammaltog gapu ta adda tallo a paltog a nausar; maysa a calibre 45, calibre 9mm, ken M16 riffle.
