LAOAG CITY – Indeklara ti Bureau of Fire Protection (BFP) a fire out ti napasamak nga uram iti ME Shopping Center ditoy ciudad ti Laoag iti oras ti alas-5:15 itay malem.
Inbaga ni Fire Senior Inspector Ronald Castillo, ti firemarshall ditoy ciudad ti Laoag a saan da pay a maibaga no ania ti nangrugyan ti apoy ken no mano amin ti balor dagiti nadadael iti napasamak nga uram.
Inlawlawag na a rugyan da pay laeng intono bigat ti agimbestigar no sadinno a kiddawen da ti tulong ti investigator squad manipod iti BFP ditoy probinsya.
Inbaga pay ni Castillo a naibayag ti panangsebseb da iti apoy iti baet nga umabot iti 20 a fire stations manipod iti nagduduma nga ili ditoy probinsya ti nagtitinnulong gapu ta narigatan da a nakadanun iti maikatlo a kadsaaran ti pasdek nga ayan ti bodega a kangrunaan a nauram.
Innayon na nga alisto a nagramram ti apoy gapu ta ti karga ti bodega ket naglalaok a light materials karaman ti butane gas a mabalin a pumutok ken dadduma pay.
Kabayatanna, inadmitir ni Castillo a ti kurang kadakuada nga aparatus ket ti pagangsan dagiti bombero kangrunaan na ket nagpaot ti agarop pito nga oras ti napasamak nga uram.
