LAOAG CITY – Inbatad ni Barangay Chairman Elmer Lorenzo iti Barangay Zamboanga ditoy ciudad ti Laoag a naduktalan dan no siasinno ti napan nagibelleng kadagiti dua a natay a baboy iti kapanagan.
Segun kenkuana, dagiti napan nagibelleng iti dua a baboy ket isu met laeng ti kabarangayan da nga immunan a nagsaludsudan da kalpasan a nakita ti truck da a napan iti lugar iti oras ti ala-tres ti parbangon.
Inlawlawag na nga idi damo ket naiget a paglikudan ti maseknan nga isuna ti napan nagibelleng iti baet a nakita ti truck na iti CCTV.
Nupay kasta, adda ti nangpaneknek a ti met laeng nasao a kabarangayan da ti napan nagibelleng ket ditoyen a nagpakawan ti maseknan iti kapitan.
Gapu iti daytoy, inpasingked ti kapitan a pagsasaritaan da kadagiti pada na nga opisyal ti barangay ti rumbeng nga aramiden da kontra iti napan nagibelleng ti natay a baboy iti kapanagan.
Innayon na nga agaramid da pay ti ordinansa para iti rumbeng a maaramid kadagiti basta lattan agitabon ti matay a taraken a baboy kangrunaan na ket adda ti sangsangwen a problema mainaig iti African Swine Fever (ASF) virus.
