LAOAG CITY – Agtultuloy ti naan-anay nga imbestigasion dagiti otoridad iti napasamak a pammaltog ken ni Barangay Chairman Francisco Bagay Jr. iti Brgy. 5 iti ili ti San Nicolas idi Setiembre 20, 2024.
Basar kadagiti otoridad, rumrummuar a walo ti nagbalin a tama ti nadakamat a Barangay Chairman iti bagi na.
Nupay kasta, nagkedked a mangipaay ti naananay nga impormasion ni P/Lt/Col Paul Benedick Parado, baro a Chief of Police iti nadakamat nga ili.
Segun kenkuana, awan pay ti maipaayna nga impormasion gapu ta kasuksukatna pay laeng iti narelibuan a ni P/Maj Reginaldo Dalipias.
Inpanamnama ni Parado nga adda ti maangay a presscon ti Ilocos Norte Police Provincial Office inton Lunes, Setiembre 23.
Maipalagip a natay ni Barangay Chairman Francisco Bagay Jr. kalpasan a napaltu-paltugan iti uneg ti solar da iti Barangay 5 iti ili ti San Nicolas.
Nagsagaba ti naruay a tama iti bala ti paltog ti agtawen ti 45 a kapitan ken naitaray iti Black Nazarene Hospital ngem pimmusay bayat a maag-agasan.
