LAOAG CITY – Inbatad ni Police Major Joseph Baltazar, ti chief of police iti ili ti San Nicolas a manarimaan pay laeng ti panangrebrebisar da ti CCTV footage mainaig iti napasamak a panagtatakaw iti maysa a kompanya iti Barangay 20, San Pablo ti nasao nga ili.
Maipalagip a nasurok a P1.1-milyon a pisos a naikarga iti volt ti naitaray dagiti saan pay a nabigbig a suspek.
Inbaga ni Baltazar a naalaan da metten ti palawag dagiti empleado ti nasao a kompanya ken adda payen ti naalaan da ti finger prints.
Segun ken ni Baltazar, kadagitoy a gundaway ket awan pay dagiti maitudo da a suspek iti napasamak a panagtatakaw.
Inbatad ti opisyal a basar iti panangrebrebisar da ti CCTV footage ket nakita da a dagiti suspek ket nakalugan ti motorsiklo ken binagkat da ti dua a volt nga ayan ti kwarta.
Basar iti CCTV footage, kalpasan a nabagkat dagiti dua a suspek ti volt ken inlugan da ti motorsiklo ket pimmanaw dan iti lugar,ngem kalpasan ti sumagmamano a gundaway ket nagsubli da manen ken binagkat da ti maysa pay a volt.
Innayon na a dagiti dua a volt ket nakitaan laengen iti kataltalunan iti Barangay Catuguing ti nasao nga ili.
Inpakaammo ni Baltazar a mismo a ti kapitan ti Barangay Catuguing ti nagreport iti PNP kalpasan nga intawag kenkuana ni Barangay Kagawad Jerry James nga adda dagiti naitawag a dua a volt iti katlatalunan iti paset ti barangay da.
Mainaig iti daytoy, kuna ni Baltazar a karaman pay nga imbestigaren da ket no usto met laeng ti kantidad nga ibagbaga ti kompanya a karga dagiti volts gapu ta rumrumuar a ti nasao a kantidad ket napastrek da laeng iti uneg ti dua nga aldaw.
