LAOAG CITY – Inbatad ni Fire Senior Inspector Ronald Castillo, ti firemarshall ditoy ciudad ti Laoag a saan nga electrical circuit ti nangrugyan ti apoy a nakauraman ti Replika ni Poon Nazareno iti Barangay 2 ditoy ciudad.
Inlawlawag na nga iti panangiwayat da ti imbestigasyon ken reenactment ket naestablisar da a ti nangrugyan ti apoy ket iti baba.
Kuna na a ditoy nga inadmitir ti maysa a caretaker a binigbig na iti nagan a Rosalie nga iti isasangpet na iti oras ti alas-dos ti parbangon ket nagsindi ti kandela.
Nupay kasta, kuna ni Rosalie nga iniddep na met laeng a dagus ti kandela kalpasan a nagkararag.
Patien ni Castillo a saan a naiddep a naimbag ni Rosalie ti kandela agingga a narunot a nangitunda ti panagbara ti nagrunutan na a nangparnuay ti apoy.
