LAOAG CITY – Inbatad ti maysa nga opisyal ti United Nation nga addan ti nasurok nga 670 a tattao ti mapapati a natay kalpasan ti landslide iti maysa a baryo idiay Papua New Guinea.
Inpakaammo ti opisyal ti United Nations (UN) migration agency a ni Serhan Aktoprak a mapatta-patta a nasurok a 150 dagiti balay a nagaburan gapu iti panagreggaay ti daga.
Kuna ni Aktoprak nga agpapan ita ket delikado paylaeng ti sitwasyon gapu iti agtultuloy a panaggiday ti daga.
Inpalgak pay ti opisyal nga agtultuloy ti panagayos ti danom ken mangitunda daytoy ti risgo iti amin nga adda iti Port Moresby.
Nasurok met a 1,000 a tattao ti naibakwit manipod iti baryo a nakadadaelan dagiti pagmulaan ti taraon ken suplay ti danom.
