LAOAG CITY – Inpakaammo ni Police Lt. Col. Joseph Baltazar, ti chief of police ditoy siudad ti Laoag nga adon dagiti nagbalin a biktima ti natiliw iti entrapment operation a ni Darwin Rudolph Jimenez Paragas, agtawen ti 35 ken residente iti Brgy. Balacad ditoy siudad.
Iti eksklusibo nga interview ti Bombo Radyo Laoag ken ni Baltazar, inbatad na basar iti nakalap da nga impormasyon ket arigna kaadoan kadagiti punpuntiryaen ti suspek ket dagiti professional wenno addaan ti stable a trabaho.
Inpetteng na a ti modus ni Paragas ket ti makisinninged wenno makirelasyon kadagiti puntirya na a biktimaen no sadinno a no maaddaan dan ti intimate scene ket ditoyen nga alaanna ti ladawan wenno ivideo na ti ar-aramiden da.
Innayon na a dagiti ladawan wenno video ket isu ti usaren ti suspek tapno makadawat ti kwarta kadagiti biktima na.
Dinayaw ni Baltazar ti kaudian a biktima ti suspek gapu ta nagbalin a natured a nagreport iti opisina da.
Mainaig iti daytoy, kuna ni Baltazar a pilaan da ti suspek ti robbery extortion, panaglabsing iti Republic Act (RA) 9165 wenno Comprehensive Dangerous Drugs Act of 2002, ken isaruno da nga ipila ti ti panaglabsing ti cybercrime Law.
Immuna iti daytoy, balligi a natiliw ti suspek iti entrapment operation nga inyuswat dagiti kameng ti pulisya ditoy ciudad ti Laoag kalpasan a nagpangta nga iwaras na ti sex video da iti maysa a maestro, agtawen ti 33 a residente iti ili ti Dingras.
Daytoy ket kalpasan a nagreport kadagiti otoridad ti biktima gapo iti panangbutbuteng kenkuana ti suspek nga iwaras na ti video no saan a mangted ti 30 a ribo a pisos.
Inadmitir pay ti biktima nga immunan a nakaipaay ti agdagop ti 40 a ribo a pisos iti suspek gapo iti panagpangpangta na nga iwaras na ti video da.
Gapo iti daytoy, nagreport ti biktima iti pulisya a nangitunda ti pannakaiyuswat ti entrapment operation a nakatiliwan ti suspek.
Kalpasan ti pannakatiliw ti suspek, sinukimat dagiti otoridad ti lugan na nga isu ti inusar na iti papan iti lugar ti transaksyon ken ditoy a nakaala da ti maysa a bassit a zip lock a naglaon ti maipagarop a napagango a bulong ti marijuana, tangkay ken bukel; tallo a pidaso ti genuine one thousand peso; 25 a pidaso ti one thousand boodle money; uppat a pidaso ti 500 a pisos ken maysa a cellphone.
