LAOAG CITY – Naipaayan ti tulong manipud iti lokal a gobierno ditoy siudad ti Laoag ti nauraman a pamilia iti Sitio Cabtacan iti Brgy. 23 ditoy siudad.
Basar iti lokal a gobierno, ti nauram a pagtaengan ket kukua dagiti agasawa nga isuda Antonio Tamayo ken Aida Tamayo nga agpada dagitoy a mannalon.
Karaman kadagiti nauram ket ti water pump, 100 a ribu a pisos a napaglakoanda ti irik, kurong-kurong, grass cutter ken maysa a karuahe.
Nagturong ti pannakabagi ti lokal a gobierno iti pagtaengan ti maseknan nga agasawa tapno maipaayan dagitoy ti tulong a kas ti semento, galba, landok ken dadduma pay.
Naammoan a kaaw-awat laeng dagiti agasawa idi Disiembre 4 ti water pump nga addaan ti complete accessories kabayatan ti distribution ti agriculture inputs iti City Agriculture Office.
Maipalagip a dumanon iti 300 a ribu a pisos ti balor dagiti nadadael iti pannakauram ti nasao a pagtaengan.
Iti agdama, agtultuloy pay laeng ti pannakaiwayat ti imbestigasion ti Bureau of Fire Protection ditoy siudad ti Laoag no ania ti namunganayan ti uram.
