LAOAG CITY – Dagus a nagturong dagiti kameng iti National Irrigation Administration iti Brgy. 17, San Felipe iti ili ti Sarrat tapno tarimaanen dagiti problema ti proyekto da a Solar Powered Pump.
Daytoy ti inpakaammo ni Mr. Jun Tamayo, dati a Presidente iti Zanjera De Masiit Farmers Association iti nasao nga ili.
Inaramid daytoy ti National Irrigation Administration kalpasan ti pannakatratar daytoy nga isyu ditoy Bombo Radyo Laoag.
Segun ken ni Tamayo, inlawlawag kadakuada dagiti kameng ti National Irrigation Administration a dagiti inkabil da a tubo ket temporary paylaeng gapu ta pangtestingan da kadagitoy.
Nupay kasta, kuna ni Tamayo a ti saan pay a nanayunan ket ti hose gapu ta uppat laeng nga ektarya ti masakupan na imbes a 15 nga ektarya kas ti naipalaon iti plano.
Kuna pay ni Tamayo nga inkari ti National Irrigation Administration a masukatan a maminpinsan dagiti naikapet a materyales nga adda ti perdisyon na.
Innayon na a naamoan da a ti petsa a nailanad a pannakaileppas ti proyekto ket agingga intono Marso 14 ita a tawen no sadinno nga isunto met paylaeng ti panagpipinnirma ti asosasyon ken ti ahensya iti katulagan sakbay a maiturnover daytoy kadakuada.
Nupay kasta, nagtalinaed ti takder ni Tamayo a no saan a matungpal amin ti National Irrigation Administration ti naipalaon iti plano para iti Solar Powered Pump ket saanda a kayat ti agpirma iti katulagan ken nasaysayaat ni parakrak da ti nasao a proyekto ken maisubli kadakuadan ti lote da.
