LAOAG CITY – Nagsapatan ni Nobel laureate Muhammad Yunus kas interim leader ti Bangladesh, kagiddan ti panangikari na a suportaran ken protehiran na ti konstitusyon ti nadakamat a pagilian.
Ti agtawen ti 84 a ni Yunus ket nagsapata iti presidential palace idiay Dhaka a naimatangan ti dinosdosena a kameng ti baro a gabinete.
Nagturong ni Yunus iti ciudad ti Dhaka, sumagmamano nga aldaw kalpasan a pimmanaw iti Bangladesh ni dati a Prime Minister Sheikh Hasina.
Maipalagip a nag-resign ni Hasina kalpasan ti sumagmamano a lawas a panangipatungpal dagiti estudyante ti nalawa a tignay protesta a nakatayan ti ginasut a tattao a nangrubrub iti panawagan a pumanawen iti pwesto na.
Immuna iti daytoy, naiwaragawag ti desisyon a ni Yunus ti maipatugaw kas interim presidente iti Bangladesh ket naiwaragawag kalpasan ti taripnong iti nagbaetan da President Mohammed Shahabuddin, military leaders ken student leaders.
