LAOAG CITY – Iniyistorya a mismo ni Cherie Crisologo, OFW idiay Ha’il, Saudi Arabia no kasano ti pannakairaman na a napabasol a nagtakaw ti kwarta iti amo na.
Segun kenni Crisologo, agawid intono Disyembre 29 ditoy Pilipinas ti kadua na nga OFW a ni Racquel Fernandez ken bayat nga isagsagana ti maseknan dagiti kagamitan na ket nakita daytoy ti amo da isu gapo na nga inayaban na dagitoy ken inbaga na a mapukpukaw ti alkansya na.
Inlawlawag ni Crisologo a saan da met nga ammo no anya ti napukaw nga alkansya gapo ta saan met pay a pulos a nakita ken kalpasan daytoy ket pinarwar na ida ken tinawagan na ti kabsat da ken nagsukimat da kadagit kagamitan da a dua, agingga a timmawag ti pulis.
Kunana nga idi adda da iti ruwar ti police station ket kinasarita isuna ti amo na a tapno mawaya-wayaan ket ibaga na a ni Fernandez ti nangala ti alkansya ngem saan a nga inaramid daytoy gapo ta ammo na met nga awan ti innala ti kadua na ken dua da ti nagkuyog.
Dinakamat na a gapo ta saan na a pinatgan ti kalikagom ti amo da ket nairaman isuna a napabasol a nagtakaw.
Patien na a kastoy ti inaramid ti amo da gapo ta manamnama ti panagawid ni Fernandez ditoy Pilipinas.
Kalpasan daytoy, kuna ni Crisologo a bayat ti open forum da iti amo da ket intudo manen daytoy a ni Fernandez ti nangala ti singsing ken kwintas, ken iti sumaruno nga aldaw ket inbaga manen ti amo da nga adda ti alkansya iti package nga inpaw-it ni Fernandez.
Inpetteng met ni Crisologo a no kalikagom da ti agtakaw ket saan a ti alkasya ti paginteresan da gapo ta agkaiwara met ti alahas ken kwarta na iti kwarto da ken no pudno a nagtakaw da ket naglibas da kuman no adda ti aramid da.
Mainaig iti daytoy, kunana a ti trabaho da laeng kuma ket iti uneg ti balay ti amo da ngem agserserbi da pay a photographer, ken adda ti pannakadelay ti sweldo da.
Kunana nga iti agdama ket nakarwar dan iti pagbalodan ngem adda ti sabali nga ayan da bayat a maiyur-uray ti pannakisango da iti korte nga isu ita ti pagam-amkan da gapo ta saan pay a nalpas ti kaso da.
Kabayatanna, kuna met ti Ms. Faye Crisologo, kabsat ni Cherie a kalikagom na latta nga idanon daytoy iti POEA.
