LAOAG CITY – Dumanon iti 240 a ribu a pisos ti balor iti pannakadadael ti nauram a pagtaengan iti Barangay 6 San Agustin ditoy siudad ti Laoag.
Segun ken ni Senior Fire Officer 2 Melven Gappi ti Bureau of Fire Protection ditoy siudad ti Laoag, nabigbig dagiti dua a senior citizen nga agkabsat nga agnanaed iti nauram a pagtaengan nga isuda Elizabeth Albano ken Yvonne Albano y Ronelia ken residente iti nasao met laeng a barangay.
Inbatadna a 7:35 itay bigat idi nakaawatda ti tawag a mangipakpakaammo nga adda ti uram rason nga insigida a napanda nagresponde iti lugar ken 8:25 idi naideklarar a fire out.
Inlawlawagna nga adda ti siam a fire truck ti napan nagresponde iti uram pakairamanan ti Bureau of Fire Protection iti ili ti Vintar, Bacarra ken San Nicolas.
Naammoan a nagpaut ti 27 a minuto sakbay a naan-anay a nasebseban ti uram.
Innayonna a rumrummuar iti imbestigasionda a nangrugi iti kusina ti napasamak nga uram iti saan pay a masinunuo a rason.
Kabayatanna, karaman pay a naisalbar ket ti dua nga aso a taraken dagiti dua nga agkabsat a senior citizen.
