LAOAG CITY – Maluksaw ti pamilia Andres iti nakaam-ames a napasamak iti kapamiliada kalpasan a maipagarup a pinang-orda ti natangken a banag iti rupana iti Brgy. 2 ditoy siudad ti Laoag.
Segun ken ni Celesio Andres, kabsat ti biktima, arig awan ti pusona ti nangaramid iti napasamak ti kabsatna gapu ta nakaro ti sinagaba a sugat.
Inbatadna nga awan met ti malagipna a mabalin a nakariri ti kabsatna iti kallabes a posible a mangaramid iti nasao nga insidente.
Nupay kasta, inlawlawagna nga adda dagiti naipadanon a reklamo iti barangayda maipanggep iti pannakaipasdek ti pagtaengan ti biktima.
Innayonna a nasaysayaat latta koman a pinilayda ti saka ti kabsatna nga imbes iti panangpang-orda iti rupana a saan a makatao.
Immuna iti daytoy, inpakaammo ni Luis Sison, agtartrabaho kas maysa a construction worker iti maipatpatakder a pagtaengan ti biktima nga isuna mismo ti immuna a nakakita ti biktima a nakadasay iti saan a sementado a dalan.
