LAOAG CITY – Saanen a napilaan ti kaso iti pulis a nangiturong iti kotse a nangdarusdos kadagiti tallo a behikulo iti sarrat bridge a sakupen iti Brgy. 20 iti ili ti Sarrat.
Daytoy ti inpakaammo ni Police Major Hermy Ancheta, chief of Police iti Philippine National Police iti nasao nga ili.
Kunana a nakasarita dan ti pamilya dagiti biktima pakairaman ti pamilya ti pimmusay a nakalugan ti tricycle no sadinno saan da nga interesado a mangipila ti reklamo kontra iti pulis gapo ta bayadan amin ti maseknan ti magastos da iti panakapaagas ken panakaimansayag ti bangkay ti pimmusay a biktima.
Iti agdama, kuna ni Ancheta a nagsublin iti duty ti pulis iti PNP-Piddig kalpasan iti reglementary period.
Maipalagip a natay ti maysa a babai ken sangapulo dagiti nasugatan iti panangdarusdos ti maysa a kotse kadagiti tallo a behikulo a sarsarunwen na pakairamanan ti kurong-kurong, tricycle ken motorsiklo.
Nabigbig daytoy a ni Magdalena Susa, addaan ti umno a tawen, ken residente iti Barangay Root iti ili ti Dingras.
Basar iti imbestigasyon ti Philippine National Police iti ili ti Sarrat, agsasaruno nga agpadaya ti dagiti nasao a luglugan ken ti kotse nga adda iti likudan dagitoy.
Gapo iti daytoy, nagsagaba ti sugat amin dagiti karaman iti desgrasya ken naitaray dagitoy iti Dingras District Hospital ngem naideklara a pimmusay ni Magdalena Susa.
Naamoan a da Simplicio ken dagiti dua a kinalubbon na ket naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakataming da.
