LAOAG CITY – Inlawlawag ni Mrs. Marietta Biasong Agustin iti Barangay Baresbes iti ili ti Dingras, ikit ni Deus Mel Agustin Tamayo, agtawen ti 23, maysa a truck driver ken maysa kadagiti biktima ti desgrasya iti Barangay Suyo iti nasao nga ili nga agsasarita da iti pamilya ti pimmusay a ni Meliton Alipio Domingo, driver ti kurongkurong, agtawen ti 48 ken residente iti Brgy. Lagui Sail ditoy ciudad ti Laoag.
Segun kenni Agustin, bayat ti panagturong da iti ospital iti ciudad ti Batac idi bigat kalman ket timmawag kenkuana ti PNP tapno ipakammo nga adda iti istasyon ti pamilya ni Domingo.
Gapo iti daytoy, nagdesisyon da a dumagas ken dita kuma a gundaway ket agsasarita da ngem adda ti timmawag iti maysa a miembro ti pamilya Domingo a baliwan da ti petsa ti saritaan tapno makapagtutulag da pay a nasayaat.
Inbatad na a kalpasan daytoy ket nagdesisyon da a dua a partido nga intono Martes iti alas-nuebe ti bigat ket agsasarita da mainaig iti napasamak.
Inpetteng na a sipud naiyakar iti ospital iti ciudad ti Batac ti kaanakan na ket konkontaken da met ti pamilya Domingo.
Mainaig iti daytoy, kinumpirmaran ni Agustin a natukkol ti akin-kannawan a saka ni Deus ken rumrumwar nga adda ti fracture iti paset ti rupa na ngem adda ti puot ti pasyente.
Kunana a ti laeng damdamagen ni Deus ket no apay a nadagsen ti saka na ngem kunana a saan da pay nga inpudno a natukkol daytoy gapo ta maamak da no anya ti mabalin a reaksyon daytoy.
Ummunan nga inbatad ni Inbatad ni Police Captain Joseph Calderon, ti chief of police ti PNP-Dingras a no bilang man saan a maurnos dagiti dua a pamilya ti insidente ket nakasagana met dagiti dokumento a maipila kontra kenni Deus Agustin.
Maipalagip a rumwar ti kurongkurong iti highway ken agturong iti laud a direksyon idinto a ti motorsiklo ket agpadaya ngem maipagarop nga immovertake daytoy.
