LAOAG CITY – Kallikagum ni Christine Jane Borromeo Nicolas, residente iti Brgy Ferdinand iti ili ti Marcos a mabaliwan ti serbisyo a maipapaay iti Governor Roque Ablan Senior Memorial hospital dioy ciudad ti Laoag.
Daytoy ti inbatad ni Nicolas kalpasan iti maipagarop a nabayag a panakataming ti kabsat na a ni Chrismas Nicolas, agatawen ti 24, ken awanan ti asawa ken agdama nga agnanaed iti Brgy 38-B mangato iti ciudad ti Laoag.
Segun kenni Nicolas, naitaray ti kabsat na iti nasao nga ospital iti oras ti 2:00 ti malem idi laeng kalman ket apaman a nakadanon da iti ospital ket awaniti nakita na a quick response dagiti nurses ken doctors iti emergency room.
Inpakaammo na a kalpasan ti lima nga oras a panagur-uray da, ti laeng nagbalin a konklunsiyon dagiti staff ket awan iti technician ti CT-scan da ken iti kabigatan na laeng nga adda daytoy.
Gapo iti naamwan da, kuna ni Nicolas a naawanen ti puot iti kabsat na ken nagdesisyonan da nga iyakar ti black nazarene ngem apaman a naitaray iti kabsat na ti nasao nga ospital ket ditoy metten a napugsatanen iti anges.
Inbatad na a bayat nga ada iti ospital, naobserbaran na a saan nga alisto ti garaw dagiti nurses ken doctor ken iyun-una da dagiti pasyente a saan a kritikal ti kondisyon na.
Maladingitan ni Nicolas iti ipupusay iti kabsat na gapo ta daytoy iti bread winner iti pamilya da ken ada iti pabpabasaen na a dua pay a kabsat da.
Nupay kasta, saan met nga agipila ti reklamo ngem kallikagum na nga maipadanon ti pasamak kadagiti agpanpanday linteg iti probinsiya nangruna kenni 1st District Representative Sandro Marcos kenni Gov. Matthew Marcos Manotoc tapno maikkan isuda iti pagmenamenaan ken mabalbaliwan ti nabayag a panakataming dagiti pasyente iti nasao nga ospital.
Iti agdama, nagdesisyon ti pamilya a maikabil iti bangkay ni Chrismar Nicolas iti ili ti Marcos.
