LAOAG CITY – Inpetteng ni Mrs. Marife Dumadag nga awan ti ammo na a rason ti pannakapalto-paltog ti asawa na a ni Sherwin Dumadag bayat nga adda iti waiting shed iti sango sango ti Rural Health Unit iti Brgy. Sta. Cruz iti ili ti Badoc.
Kuna na a no bilang adda ti nakabasulan ti asawa na ket maaddaan ti umiso panagsasarita a saan kuma a panagpapatay.
Segun kenni Mrs. Dumadag , awan ti ibagbaga ti asawa nga anyaman a problema uray iti trabaho na.
Gapu iti daytoy, nagpanawagan ni Mrs. Dumadag a dumatag ti nangpapatay ti asawa na ken makonsensya kuma daytoy.
Mainaig iti daytoy, awan met ti ammo ni Mr. Andres Dumadag, ti ama ti biktima a rason ti pannakapapatay ti anak na.
Kabayatanna, kinumpirmaran ni Police Capt. Chris Anthony Sorsano, hepe ti PNP Solsona a maysa ti biktima a napilaan ti reklamo nga attempted murder mainaig ti pannakatambang ni Sangguniang Bayan Member Jovencio Pascua itay napalabas a tawen.
Kuna na a karaman a napilaan ni Mayor Joseph de Lara ti attempted murder kas regular filing iti kallabes.
