LAOAG CITY – Inpakaammo ni Police Captain Ashley Cacayorin, ti Deputy Chief of Police ti PNP-San Nicolas a nagsaritan dagiti kameng ti pamilya ti nangiturong ti karwahe ken ti nakadungpar a wing van truck iti Brgy. 16 iti nasao nga ili.
Kunana a basar iti nagbalin a saritaan ti dua a partido, nagdesisyon da a bayadan ti pamilya ti driver ti trcuk ti amin a magastos ti pamilya Sahagun iti ospital agingga iti panakaitabon ti biktima a ni Dominador Sahagun.
Inbatad na a saan pay a masinunuo ti Pamilya Sahagun nu mangipila da ti kaso kontra iti driver ti truck.
Dinakamat na pay a napagtutulagan da a baliwan dan to ti agsasarita kalpasan iti panakaitabon ni Sahagun ken tapno maamoan no mangipila da ti kaso wenno saan.
Kabayatanna, nakarwaren iti pagbaludan ti driver ti truck kalpasan iti 36 nga oras a panakaibalud na.
Mainaig iti daytoy, kuna ni Cacayorin a no ituloy ti pamilya Sahagun a mangipila ti reklamo ken apaman a maipila ket
maisubli iti pagbaludan ti driver ti truck kalpasan ti tallo a bulan a panakaproseso iti warrant of arrest.
Maipalagip a ni Dominador Sahagun ket pimmusay karaman iti kabalyo kalpasan a dinungpar ti maysa a wing van truck.
