LAOAG CITY – Nagkinnumprontar ti pamilya ti pimmusay a kutsero ken pamilya iti nangiturong iti wing van truck bayat ti pannakaiyuswat ti saritaan seknan iti napasamak ti desrasya iti Barangay 16 iti ili San Nicolas.
Daytoy ti inbatad ni Police Captain Ashley Cacayorin, ti Deputy Chief of Police ti Philippine National Police-San Nicolas.
Segun kenni Cacayorin, napasamak ti komprontasyon kalpasan a saan nga immanampong ti pamilya ti driver ti wing van nga agbayad ti kantidad nga inkeddeng ti pamilya ti biktima nga umabot iti 200 a ribo a pisos.
Inbatad ni Cacayorin a ti laeng kalikagom a bayadan ti pamilya ti driver ti wing van truck ket 30 ribo a pisos.
Gapo iti daytoy, kunana nga awan ti napintas a nagresultaan ti saritaan rason nga addan to manen ti panagsasarita dagiti dua a pamilya iti sumarsaruno nga aldaw.
Inlawlawag ni Cacayorin a no saan to pay laeng a makapagsarita dagiti dua a pamilya ket iyuli da daytoy iti piskalya ken daytoy ti mangikeddeng no mano ti bayadan ti pamilya ti driver ti wing van truck.
Maipalagip a kalikagom ti pamilya ti biktima a bayadan amin ti driver ti truck ti gastos manipud iti ospital agingga a maitabon ti bangkay ti kutsero.
