LAOAG CITY – Nakapagsaritan ti dua a partido mainaig iti pannakatay ti maysa a lakay kalpasan a nadungpar ti maysa a pampasahero a bus bayat ti panangiturong na ti motorsiklo na iti national highway iti paset ti Barangay Pias, Currimao, Ilocos Norte.
Inbatad ni Police Capt. Michael Permison, ti OIC Chief of police iti ili ti Currimao, saanen nga agpila ti reklamo ti pamilya ti biktima a ni Orlino Salaan y Rangasan, agtawen ti 63, naasawaan ken residente iti Brgy. Victoria iti ili ti Currimao kalpasan a nagkari ti driver ti bus a ni Romel Laforga y Bautista, agtawen ti 45, naasawaan, ken residente iti Brgy. Pasuc iti ili ti Badoc a tumulong iti magastos da.
Immun-una iti daytoy, natay bayat a maag-agasan iti Mariano Marcos Memorial Hospital and Medical Center iti ciudad ti Batac ti biktima gapu kadagiti sinagaba na a nakana a sugat kangrunaan na iti ulo na.
Inbatad ni Permison a basar iti palawag ti driver ti bus , saanna a dagus a nakita ti biktima gapu ta awan ti silaw ti likud ti motorsiklo na.
Malaksid iti daytoy, kuna ni Laforga nga inbaba na ti silaw ti bus gapu ta adda ti kasinnabat da a lugan a naraniag unay ti silawna.
Naamoan nga awan ti helmet ti biktima idi napasamak ti insidente.
Gapu iti daytoy, inbalakad ni Permison a masapol nga agusar dagiti motorista ti helmet tapno nataltalged da met laeng kabayatan ti panagiturong da ti motorsiklo.
