LAOAG CITY – Saanen a mapilaan ti kaso iti driver ti Isuzu Elf Truck a nakadinnungpar ti maysa a kurong-kurong no sadinno a pimmusay ti driver iti paset ti Josefa Llanes Escoda National Highway bisinidad ti Barangay Juan iti ili ti Solsona.
Daytoy ti inpakaamo ni Police Capt. Randy Damo, ti chief of police iti ili ti Solsona.
Immunan a nabigbig ti biktima a ni Joel Asuncion, agtawen ti 39, awanan ti asawa, ken residente iti Barangay Man-anteng iti ili ti Solsona idinto a ti nangiturong ti Isuzu Elf truck ket ni Warren Ramos, agtawen ti 30, naasawaan ken residente iti Barangay Maan-anteng iti ili ti Solsona.
Kuna ni Damo a nagturong ti pamilya ti driver ti kurong-kurong iti kuerpo ti pulisya tapno makasarita ti suspek.
Inbatad ti opisyal a basar iti inisyal a napagsaritaan ti dua a partido, awanen ti plano ti pamilya ti kurung-kurong nga agpila ti kaso kontra iti driver ti Isuzu Elf Truck ngem kiniddaw da a tumulong kadagiti magastos da agingga a maitabon ti bangkay ti biktima.
Maipalagip nga iti imbestigasyon dagiti otoridad, agpadpadaya ti biktima idi ginandat na ti ag-overtake iti sarsarunwen na a behikulo no sadinno a saanna a naripar ti sumungad nga agpalaud nga Isuzu Elf truck a nagresulta ti panagdinnungpar da.
Kuna na pay a ginandat ni Ramos a liklikan ti biktima a nangitunda met iti pannakaidungpar na iti poon ti kayo nga adda iti igid ti kalsada. Inpakaammo ni Damo nga agpada a naitaray da Asuncion ken Ramos iti Dingras District Hospital iti ili ti Dingras ngem naideklarar a pimmusayen ti nasao a biktima.
