LAOAG CITY – Nakapagsaritan ti pamilya ti pimmusay nga ubing ken ti driver iti Toyota Fortuner iti ciudad ti Batac.
Segun ken ni Police Lt. Col. Adrian Gayuchan, ti chief of police ti Philippine National Police iti ciudad ti Batac, saanen nga agpila ti reklamo ti pamilya ti agtawen ti innem nga ubing a lalaki kontra iti driver ti SUV a ni Mariano Francisco Nalupta.
Inbatad ni Gayuchan a ti napagsaritaan ti dua a partido ket ibaklay amin ni Nalupta ti magastos agingga a maitabon ti biktima.
Immunan nga inbatad ni Gayuchan a basar iti imbestigasyon da ket nagparking ti kurong-kurong iti igid ti kalsada nga asideg ti drive way ken nabati ditoy dagiti tallo a menor de edad nga agtawen ti walo, innem ken dua idinto a ti lola ken ina dagitoy ket napan da nakitienda.
Inlawlawag na a basar pay iti imbestigasyon da ket nagay-ayam ti agtawen ti innem ken idi sumrek iti driveway ni Nalupta ket saan na a nakita ti ubing rason a nadungpar ken naipasirok daytoy iti nadakamat a behikulo na. Gapo iti daytoy, nagsagaba ti sugat iti ulo ti biktima ken dagus a naitaray iti ospital ngem naideklarar a pimmusayen.
