LAOAG CITY – Inlawlawag ni Mrs. Cherry Joy Garma, information Officer iti Department of Education (DepEd) Ilocos Norte a kalpasan met a naipadanon iti division office ti pannakaiwaras ti solicitation letter manipud iti Paoay National High School ket dagus a naipasardeng.
Segun kenni Garma, a saan a rumbeng ti panag-solicit ti pagadalan ken nabayagen daytoy a maibagbaga kadagiti amin a mangisursuro partikular kadagiti school heads.
Inlawlawag na a kanayon met a maipalpalagip kadagitoy a saan da nga aramiden ti panag-solicit kas met laeng iti No Collection Policy iti amin a pagadalan a rumbeng a masurot.
Ummuna iti daytoy, inadmitir ni Mr. Daniel Tabili, ti school principal II iti Paoay National High School ti pannakaiwaras ti solicitation letter kadagiti naggannak iti nasao a pagadalan.
Inpalgak na a ti nasao nga addang da ket napagnunomoan laeng tapno masuposopan ti nakurang a pondo manpod iti MOOE a naiyalokar iti pagadalan bayat ti panagsagsagana ti pagadalan para iti pannakaiysuwat ti face to face classes dagiti agad-adal.
Mainaig iti daytoy, kuna ni Garma a basar kenni Dr. Joan Corpuz, Schools Superintendent, a no saan a nakasagana ti pagadalan a mangiyuswat ti face to face classes babaen iti MOOE da ket saan kuma rumbeng a mapalubusan.
Inpetteng na a ti mapalubusan laeng ket ti voluntary donations manipud kadagiti nagduduma nga stakeholders ken saan met a malapdan dagiti naayat nga agidonar ti kasapulan.
Kabayatanna, kunana pay a no masapol ti nayun a pondo ket adda met ti fund raising nga iyus-uswat ti nagduduma a pagadalan ngem masapol nga aprubaran pay laeng ti division office.
Iti babaen ti DepEd Memo, mapalubusan ti fund raising activity ngem nasken nga aprubaran amin dagiti miembro iti PTA ken napagtutulagan no kasano ti format ti aktibidad ken amin dagitoy ket nasken a mailanad iti proposal nga isubmitir da iti division office para iti pannakaaprubar na.
Karaman kadagiti mabalin nga isayangkat ti pagadalan a fund raising activity ket ti Walk for a Cause, Run for a Cause ken Mini-concert ken dadduma pay.
Innayon na a saan met a maap-aprubaran ti popularity contest.
