LAOAG CITY – Panagsalungasing iti RA 9516 wenno Illegal Possession of Firearms and Explosives ti maipila a kaso kontra kenni Samuel Laurelio kalpasan a nakumpiskar dagiti sumagmamano nga Improvised Explosive Device wenno IED iti balay da babaen ti naiwayat a search operation iti Brgy. Gabut Norte iti ili ti Badoc.
Daytoy ti kinumpirmaran ni Police Chief Master Sergeant Sean Francis Bugaoisan, duty desk officer ti PNP ditoy ciudad ti Laoag.
Immunan nga inbunannag ni Barangay Kagawad Eddie Paguyo iti nasao a barangay a nasayaat iti pannakaisayangkat ti search operation gapu ta kinapkapan na dagiti kameng ti PNP sakbay a nagsukisok da iti pagtaengan ni Laurelio.
Saan a maibaga ti kagawad no simrek dagiti otoridad iti pagtaengan ti subject nga awan dagiti opisyal ti barangay kas ti ibagbaga ti pamilya a naimula dagiti nakumpiskar nga ebidensya.
Immunan nga inlawlawag ni Police Lt. Col. Amador Quicho, chief of police ti PNP-Laoag a ni Laurelio ket maipagarop nga agsupsuplay ti dinamita ken ramramit iti iligal a panagkalap iti Barangay Gabu ditoy ciudad.
Kunana nga idi positibo ti nagbalin a beripikasyon da ket nagaplikar da ti search warrant ken inyuswat da ti operasyon.
